“…Hortaz, hezkuntza eleaniztuna da aukerarik egokiena hizkuntza gutxituetako hiztunentzat, eta, ahal dela, hizkuntza gutxitu horrek izan behar luke ardatza; izan ere, gutxitua izanik, eskolaren babesari eta sustapenari esker garatu daiteke. Hizkuntza gutxituan oinarritzen diren hezkuntza-eredu eleaniztunak, beren zailtasun guztiekin, posible dira, eta, Euskal Herrian frogatu den bezala, eraginkorrak dira, ez soilik bertako hizkuntza gutxituarentzat, baizik eta baita hegemonikoarentzat ere [17,18,19]. Oso testuinguru ezberdinetan egindako esperientziek ere [20] erakusten dute bide hori egokia dela; esate baterako, Senegalen, non wolofera eta pulaarra hizkuntza gutxituak diren eta frantsesa hegemonikoa, edo Kanbodian, non hizkuntza nagusiarekin batera (khmerera) beste bost hizkuntza gutxitu erabiltzen diren (brao, bunong, kavet, kreung eta tampuen).…”