Məqalədə mazutun hidrokrekinqi prosesində istifadə edilən keçid metalları ilə modifikasiya olunmuş təbii alümosilikat -hallozit katalizatorlarının qurluşlarının müxtəlif fiziki-kimyəvi üsullarla tədqiqindən bəhs edilir. Hallozit Ni, Co, Mo metalları ilə ion-dəyişmə və hopdurma üsulu ilə modifikasiya olunub və nümunələrin faza tərkibi müəyyən edilmişdir. Termoqravimetrik, differensial termiki qravimetriya analiz metodları vasitəsilə təbii və 5%Ni, 5%Co ilə modifikasiya olunmuş hallozitin termiki parametrləri öyrənilmişdir. Tədqiq edilən katalizator nümunələri suspenziya şəklində mazutun hidrokrekinqi prosesində (400-450 °C, 0.5-6 MPa, katalizatorun miqdarı 2.5 % olmaqla) istifadə edilmiş və 80-85 % həcm açıq rəngli neft məhsulları (benzin, dizel fraksiyaları) alınmışdır. Açar sözlər: suspenzləşdirilmiş katalizator, mazut, alümosilikat, hallozit, keçid metalları, benzin fraksiyası, dizel fraksiyası.