Məqalədə şəxsi həyat və fərdi məlumtların mahiyyətinə dair yanaşmalar şərh olunur. Fərdi məlumatların qorunmasına dair beynəlxalq hüququn formalaşması və inkişaf tarixi, həmçinin Azərbaycanın müvafiq qanunvericilik bazası araşdırılır. Fərdi məlumatların "qara bazarı"nın formalaşması səbəbləri və xüsusiyyətləri müəyyən olunur. Azərbaycan mentalitetində həssas fərdi məlumatların yeri və onlarla bağlı problemlər analiz edilir. Bu problemlərin aradan qaldırılması üçün kompleks təkliflər irəli sürülür.Açar sözlər: şəxsi həyat, fərdi məlumatlar, fərdi tibbi məlumatlar, həssas məlumatlar, fərdi məlumatların "qara bazarı".
GirişFərdlər haqqında məlumatların toplanması və emalı prosesləri bəşəriyyətin bütün inkişaf mərhələlərində olmuşdur. Müasir dövrdə isə sürətlə inkişaf edən İKT, o cümlədən müxtəlif elektron dövlət sistemlərində elektron kommersiya, elektron ödəniş, çoxsaylı İnternet xidmətləri, çoxfunksiyalı smartfonlar, GPS sistemləri, smart televizorlar, Əşyaların İnterneti texnologiyaları, videomüşahidə sistemləri, biometrik texnologiyalar və s. hər bir fərd haqqında fasiləsiz olaraq böyük həcmdə informasiya toplamaq imkanlarını dəfələrlə artır. Bu imkanlar da, öz növbəsində, fərdi məlumatlarla bağlı daha geniş məqsədlərin ortaya çıxmasına zəmin yaradır.4-cü sənaye inqilabı isə insan fəaliyyətinin bütün sahələrində olduğu kimi, fərdi məlumatlarla bağlı münasibətlərdə də yeni eranın başlanmasından xəbər verir. Kiberfiziki, kiberbioloji sistemlərin, intellektual sensorlar şəbəkələrinin, süni intellekt, nano və superkompüter texnologiyalarının, robototexnikanın, pilotsuz uçuş aparatlarının meydana gəməsi və inkişafı fərdi məlumatlarla bağlı indiyə qədər həllini tapmayan problemləri daha da kəskinləşdirməkdə və onların sırasına yenilərini əlavə etməkdədir.Sonuncu sənaye inqilabının əsas çağırışlarından biri də Big data texnologiyalarıdır. Bu texnologiyaların istifadə etdiyi "xammal"ın mühüm hissəsi də məhz fərdi məlumatlardır. Əslində, Big data-nı aktuallaşdıran əsas faktorlardan biri də fərdi məlumatların bolluğu və əlyetərliliyidir. Ona görə də hazırda fərdi məlumatların toplandığı böyük həcmli verilənlər idarəetmə, iqtisadi, hüquqi və çox təəssüflər olsun ki, həm də kriminal fəaliyyət üçün strateji hədəfə çevrilib.Məlum olduğu kimi, dövlət hakimiyyətinin dayanaqlılığı, təhlükəsizliyi və effektiv fəaliliyətinin təmin edilmsi mürəkkəb komponentli və operativ məlumat bazalarının, o cümlədən fərdlər haqqında məlumatların toplanmasını, analizini və sistemləşdirilməsini zəruri edir.Digər tərəfdən, Big data-nın meydana gəlməsi və qlobal miqyasda inkişafı fərdi məlumatların qorunması ilə bağlı siyasətin dəyişməsini zərurətə çevirir. Yəni, artıq fərdi məlumatlarla bağlı vətəndaşların hüquqlarının qorunması vəzifəsi ilə yanaşı, onlardan faydalı "xammal" kimi səmərəli istifadə edilməsi məsələsi aktuallaşır.Fərdi məlumatlardan istifadə ilə bağlı hüquqi məhdudiyyətlərə baxmayaraq, onlardan qeyriqanuni biznes və kriminal məqsədlərlə istifadəyə olan tələbat bu sahənin "qara bazarı"nın formalaşmasına rəvac verir. Beləliklə, fərdi m...