Lëvizjet emancipuese të grave kanë lënë gjurmë të ndjeshme në historinë e zhvillimit të vetëdijes qytetare, por edhe në mënyrë specifike
qoftë në pikëpamja teorike në shumë fusha disiplinore, siç është filozofia, sociologjia, letërsia, psikologjia e historia, deri të ato praktike me
veprimtaritë konkrete aktive. Duke qenë se lëvizjet feministe përfshijnë një shumëllojshmëri disiplinash, ato kërkojnë që të të zbulohen hipotezat e fshehta, të cilat shumë studiues i perceptojnë si studime të përgjithshme por që në fakt na dalin se janë vetëm studime me karakter të perspektivës së burrave. Nga perspektiva e filozofisë politike, ideologjitë e majta anojnë nga idetë që rolet tradicionale gjinore, ashtu siç imponohen përmes një tradite të gjatë të ligjërimit dhe imponimit patriarkal, shërbejnë si vegla për të mirëmbajtur role të tilla në shërbim të një sistemi të caktuar ekonomik që mbijeton përmes eksploatimit të fuqisë punëtore. Në këtë kuptim, patriarkati ligjërohet se është sistem mbështetës për feudalizmin, imperializmin dhe kapitalizmin, përderisa i sheh gratë si fuqi punëtore që kryejnë punë riprodhuese, kryejnë punë edhe në sferën publike, por e mirëmbajnë edhe ritmin e punës në sferën private.