Roli i asistentit të nxënësve me nevoja të veçanta arsimore për gjithëpërfshirje në klasë

Abstract

Ky hulumtim ka për qëllim të identifikojë praktikat e asistentit të nxënësve me nevoja të veçanta arsimore dhe rolin e tij në procesin e gjithëpërfshirjes në klasë. Meqë mbështetja nga asistenti/ja është një formë e re e mbështetjes së nxënësve me nevoja të veçanta arsimore në Kosovë, që ka filluar me një numër të vogël asistentësh të përfshirë në këtë proces, por me synime për rritje në vazhdimësi, identifikimi i rolit të asistentit/es në procesin e gjithëpërfshirjes është i rëndësishëm për ngritjen e cilësisë së këtij shërbimi. Në këtë hulumtim është përdorur qasje cilësore, me metoda eksploruese dhe përshkruese. Në mostrën e hulumtimit janë përfshirë 13 asistentë dhe 13 mësimdhënës të klasave në të cilat shërbejnë asistentët. Janë përdorur katër lloje të instrumenteve: protokolli i vëzhgimit, protokolli i intervistës së asistentëve të nxënësve me nevoja të veçanta arsimore, protokolli i intervistës së mësimdhënësve dhe listë-kontrolli për analizën e dokumenteve. Gjetjet nga instrumentet e hulumtimit janë interpretuar sipas temave të përcaktuara, të cilat kanë dalë nga pyetjet e hulumtimit. Gjatë integrimit të instrumenteve sipas rasteve, janë nxjerrë teori për mbështetjen, të cilën e ofron asistenti për nxënësit me nevoja të veçanta arsimore për gjithëpërfshirje në klasë. Po ashtu, rezultatet janë diskutuar duke i analizuar dhe krahasuar me gjetjet në hulumtimet ndërkombëtare. Rezultatet e hulumtimit tregojnë se asistenti për nxënës me nevoja të veçanta arsimore aktualisht ofron mbështetje kryesisht individuale - për nxënësin e caktuar me nevoja të veçanta arsimore dhe është efektiv për përfshirjen dhe zhvillimin e nxënësve me nevoja të veçanta arsimore në klasë, por, në shumicën e rasteve, vërehet veçimi i tyre. Prandaj, për një sistem të mirëfilltë arsimor gjithëpërfshirës, rekomandoj transformimin e këtij roli, nga ,,Asistent për fëmijë/nxënës me nevoja të veçanta arsimore”, në një rol që do të mbështeste mësimdhënësin dhe të gjithë nxënësit e klasës - sipas nevojave, dhe do të promovonte gjithëpërfshirjen në klasë.