“…De maneira paralela, son de salientar os esforzos da escola de historiadores da cultura escrita baseada na Universidade de Alcalá de Henares baixo o maxisterio do profesor Antonio Castillo, e que nucleou dende setembro do 2004 a Rede de Arquivos e Investigadores da Escrita Popular (www.redaiep.es), da que fan parte investigadores a título individual e diversos arquivos da memoria popular en todo o Estado español. En boa parte dos seus membros, e na súa escola matriz, o interese pola escrita popular parte de presupostos diferentes aos dos estudos migratorios ou a historia social e cultural en xeral pois, seguindo o trazo dos estudos clásicos sobre a cultura escrita da Idade Moderna iniciados por autores como Roger Chartier, o meirande interese desta tendencia céntrase nas condicións materiais da escrita e da súa evolución, os códigos e fórmulas que foi adoptando a expresión escrita dos sectores sociais medios e subalternos, e mais os modelos de difusión desas prácticas (Sierra Blas 2004, 2009. Por expresalo brevemente, os intereses historiográficos desta escola están máis interesados en "como" a cultura escrita se reproduce, evolúe e transmite, que en "que" información fornecen os documentos manuscritos sobre a mentalidade e o contorno social e cultural, así como o económico, dos emigrantes, aspecto este que interesa de maneira sobranceira aos estudos migratorios e á maioría dos historiadores da emigración en particular.…”