Eraikuntza sektorean hormigoiak eta morteroak izanda gehien erabiltzen diren eraikuntza-materialak, lehengai natural asko kontsumitzen dituzte, bere osagai nagusiak -harea eta zementua- harrobietatik lortutako harri natural desberdinak tratatuz lortu behar baitira. Baliabide naturalen erabilera murrizteko helburuarekin, artikulu honetan, galdaketako harea birziklatua morteroetan erabiltzeak propietate fisiko, termiko eta mekanikoetan duen eragina aztertzen da. Morteroetan normalean erabiltzen den kareharri harea galdaketako harea berdeaz ehuneko desberdinetan ordezkatu da (%0, %25, %50, %75 eta %100) eta mortero gogortuen porositatea, ultrasoinuen hedapen abiadura, eroankortasun termikoa, bero espezifiko bolumetrikoa, eta makurdura eta konpresio erresistentziak neurtu dira. Emaitzak aztertuta, argi dago galdaketako harea berdeak duen bentonita edukiaren eragina: beharrezko ur kantitatea igotzen duenez, porositatea handitzen du, eroankortasun termikoa, bero espezifiko bolumetrikoa eta erresistentzia murriztuz. Hala ere, galdaketako harea berdearen erabilera posiblea litzateke exijitu beharreko erresistentzia mekanikoa baxua denean, eta morteroaren eroankortasun termikoa murriztea interesgarria denean. Adibidez, zolatu eta estalkietan erabil liteke, nibelatze kapa moduan.