Konstriksyon sosyal maladi foli nan peyi Ayiti

Abstract

Nan peyi Ayiti, se pwofesyonèl sante modèn (sikyat, enfimyè, saj-fam, etc.) ak sikyat tradisyonèl (ongan, manbo) ki bay moun ki gen pwoblèm sante mantal swen. Kategori aktè sa yo pa itilize menm teknik pou rive bay pwoblèm sa yon non epi pou rive fè tretman paske yo pa wè l menmjan. Malad yo ak paran yo gen plizyè chwa devan yo. Yo plis ale kay ongan ak manbo paske yo gen menm kwayans ak yo sou maladi ak sante. Se aprè echèk tretman konplèks yo konn fè, gen terapet tradisyonèl ki konn mande paran malad yo mennen yo kay doktè. Men, doktè ki ap travay nan sant sikyatrik yo prefere kenbe malad pa yo menm "pandan ventan" olye yo mande paran yo mennen yo wè yon ongan oubyen yon manbo. Entolerans ontolojik ak entolerans epistemik yo anpeche yo kolabore avèk moun sa yo. Nan atik sa a, nou pral gade ki modèl koz ak tretman moun ki ap bay swen yo itilize pou bay maladi foli sans, avan nou reflechi sou avantaj yon kolaborasyon epistemolojik ant yo ka pote pou yo ak pou malad yo.