Industria eta teknologiaren garapenak ezaugarri fisiko-kimiko bereziak dituzten material berriak sortzea eragin du, hauen artean, nanomaterialak (NMak), mikroplastikoak (MPak) eta nanoplastikoak (NPak) gero eta ugariagoak dira. NMak gutxienez nanoeskaladun (<100 nm) dimentsio bat duten materialak dira; MPak, 5 mm baino txikiagoak diren plastikozko materialak dira eta NPak, 100 nm baino txikiagoak direnak. Gaur egun, Europako legedian ez dago NMentzako araudi berezirik, nahiz eta beraien homologo makroskopikoekin alderatuta, ezaugarri fisiko-kimiko ezberdinak agertu. NMak, MPak eta NPak iturri desberdinetatik itsasora iristen dira eta beraz, itsas organismoetan eragin ditzaketen kalteen inguruko kezka zabaldu da. Gainera, NMek, MPek eta NPek duten azalera-bolumen erlazio handia eta hidrofobizitatea dela eta, arrisku gehigarri bat dute: kutsatzaile organiko iraunkorren (ingelesetik POP) garraiatzaile gisa joka dezakete itsasoan. Hau da, NMek, MPek eta NPek itsasoan dauden POPak adsorbatu ditzakete eta hauen eskuragarritasuna emendatu organismo itsastarrentzat. Gure ikerketen xedea, karbonoan oinarritutako NMek (grafenoa eta karbono-nanohodiak), MPek eta NPek hainbat espezie itsastarretan eragindako kalte fisiologikoak, zein zelula eta molekula mailako kalteak aztertzea da. Kalte horiek, POPdun NM, MP eta NPek eragindako kalteekin alderatu nahi dira ere. Orain arte burututako esperimentuetan, MPdun janariarekin elikatutako muskuiluek, urdailaren argian, liseri epitelioan eta ehun konektiboan agertu dituzte MPak. Gainera, benzo(a)pirenoa (BaP) moduko POPa adsorbatuta duten MPdun mikroalgekin elikatutako muskuiluek, BaPa metatzen dute ehunetan. Bai MPek bakarrik zein POPdun MPek immunotoxizitatea, kalte fisiologikoak eta DNA mailako kalteak eragin dizkiete muskuiluei. Itsasoa bezalako ingurune konplexu batean, kutsatzaileak ez dira modu isolatuan agertzen eta beraz, ezagutza hau kontuan hartu beharko litzateke, itsas ekosistemen osasuna eta segurtasuna bermatzeko.