İnnovasi̇ya Texnoparklarinin Fəali̇yyəti̇ni̇n İnformasi̇ya Təmi̇nati Si̇stemi̇ni̇n Arxi̇tektur-Texnoloji̇ Modeli̇ni̇n İşləni̇lməsi̇

Abstract

Məqalədə innovasiya texnoparklarının fəaliyyətinin effektivliyinin yüksəldilməsi üçün onun informasiya təminatı sisteminin arxitektur-texnoloji modelinin işlənilməsi məsələlərinə baxılmışdır. İnnovasiya proseslərinin və texnopark strukturlarının informasiya və biliklər iqtisadiyyatında rolu və əhəmiyyəti göstərilmişdir. Yüksək elmtutumlu məhsul istehsalı və xidmətlərin göstərilməsində innovasiya texnoparklarının rolu izah olunmuş və onların yaradılması xüsusiyyətləri təhlil olunmuşdur. Texnoparkların idarəetmə proseslərinin informasiya təminatının tərkib elementləri və arxitekturu verilmişdir. İnformasiya təminatı sisteminın formalaşmasına və səmərəliliyinə təsir edən amillər müəyyənləşdirilmişdir. İnnovasiya texnoparklarında bəzi müasir texnologiyaların tətbiq xüsusiyyətləri və perspektivləri araşdırılmışdır. Texnoparkların informasiya təhlükəsizliyi sisteminin arxitektur-texnoloji strukturu işlənilmiş və onun təkmilləşdirilməsi üzrə tövsiyələr verilmişdir. Texnoparkların informasiya təminatı sisteminin arxitektur modeli elm-təhsil-biznes təşkilatları platformasında elmi təşkilatların kompüter şəbəkəsi formasında təklif olunmuşdur. Texnoparkların informasiya təminatı sisteminin təkmilləşdirilməsinin perspektiv istiqamətləri üzrə tövsiyələr verilmişdir.Açar sözlər: informasiya və biliklər iqtisadiyyatı, innovasiya sistemləri, innovasiya texnoparkı, big data, informasiya təminatı sistemləri, informasiya sistemlərinin təhlükəsizliyi, arxitektur-texnoloji model.

İnnovasi̇ya Strukturlarinin Fəali̇yyət Səmərəli̇li̇yi̇ni̇n Yüksəldi̇lməsi̇ni̇n Perspekti̇v İsti̇qamətləri̇

“…İS-in fəaliyyət aspektlərinin təhlili onu göstərir ki, onun informasiya təminatı sistemi konkret şəraitdə AMEA-nın AzScienceNet platformasında qurula bilər. Belə ki, AzScienceNet elm kompüter şəbəkəsi AMEA-nın institut və təşkilatlarını elmi-tədqiqat, elmi-praktiki və tədris məsələlərinin həyata keçirilməsi zəruri olan müasir şəbəkə xidmətləri ilə təmin edir [22,23]. AzScienceNet kompüter şəbəkəsi platformasında qurulan İS-in informasiya təminatı sistemi müxtəlif idarəetmə orqanları ilə informasiya əlaqəsi, inzibati idarəetmə sistemi bloku, elm-təhsil strukturları ilə əlaqə, İKT infrastruktur bloku, İnternet, İnternet provayderləri, beynəlxalq təşkilatlarla əlaqələndirmə bloku, verilənlərin saxlanılması və emalı bloku (DATA mərkəz), istehsal (xidmət), servis təminatı bloku, daxili strukturlarla əlaqə bloku, innovasiya xidmətləri bloku, regional strukturlarla informasiya əlaqələri bloku, innovativ layihələrin idarə olunması bloku, e-xidmətlər və elmi bazalara çıxış, riyazi və proqram təminatı və s. kimi əsas struktur elemenlərindən, bloklardan təşkil olunmuşdur.…”