Auheke: I roto i ngā whakaputanga rerenga koiora, e whakamahia ana ngā ingoa Māori o ngāi kīrehe, e tautoko ana i ngā wawata o te ahurea Māori, e mau ana te reo Māori me ōna mita huhua, e whai wāhi ana te whanaungatanga o te iwi taketake me te pūtaiao, tae noa ki te mātauranga Māori me te koiora, ngā hua, ngā uara hoki. Nā te tipu mai o Ngāi Niu Tireni i te reo Māori, kua tūwhera he tatau hei whakapai ake i ngā whakaputanga rerenga koiora. Heoi anō, ahakoa e kitea ana te tautoko haere o te whakauru whakaaro Māori, o te whakatakotoranga kupu Māori (ngā ingoa o ngāi kīrehe) me ētahi mātauranga Māori, puta ana he raru ko ēhea o ngā ingoa hei whakamahi, ā, te rerekē hoki o te mita o te reo o tēnā rohe o tēnā rohe. Hei konei mātou kōrero ai i te whānui o ngā ingoa Māori o ngā manu me te whakamahi i aua ingoa i ngā whakaputanga rerenga koiora, ngā whakahaere, ngā rangahau, tae noa ki ngā pūrongo pūtaiao. E whakaaro ana, e whakamātau ana hoki mātou i ētahi āhuatanga para huarahi hei whakatairanga mōhiotanga, hei whakamahi anō hoki i ngā ingoa o ia rohe kia mātau ai, kia mārama ai i ngā manu, i te ahurea Māori hoki, i te orokohanga mai o ngā ingoa o aua manu. Ka whakaatu hoki mātou i te huringa o ētahi o ngā ingoa o ngāi kīrehe i roto i te wā poto me te tohu i ētahi ara torohū i hua ake ai ēnei āhuatanga.