Flameless errekuntzak klima aldaketaren aurka

Abstract

Gaur egun klima aldaketaren inguruan daukagun egoera hobetzeko, energia kontsumoa murriztu behar da eta teknologia eraginkorrak eta emisiorik gabekoak suspertu behar dira. Nahiz eta energia berriztagarrien alde apustu egin, gaur egungo datuen arabera, bai gaur egun zein etorkizunean erregai fosilen kontsumoa energia primarioa izango da. Egoera honen aurrean erregai fosiletan oinarritzen diren teknologietan ikerkuntzak egitea beharrezkoa da, teknologia berderantz bideratzeko. Klima aldaketari aurre egiteko flameless errekuntza garatua izan da. Flameless errekuntza produktuen aerodinamikan oinarritzen da, eta horiek birzirkulatuz erreaktiboak diluitu egiten dira. Honi esker O2ren kontzentrazioa murrizten da labeko gar tenperatura murriztuz. NOx gasen emisioak tenperaturarekin erlazionatuta daudenez, labe tenperatura murriztean NOxen emisioak murrizten dira. Gainera, produktuen birzirkulazioaren bitartez erreaktiboak aurre-berotzen badira, energia eraginkortasuna hobetzen da. Teknologia berri honek aplikazio zuzena izan dezake tenperatura altuko labe eta galdaretan; adibidez, potentzia termiko instalazioak, findegiak, industria kimikoak, zeramika, beira, zementu eta altzairu lantegiak, NOxen emisioak eta energia kontsumoa murriztuz. Flameless teknologia hobeto ulertzeko helburuarekin ikerlariak Fluido Dinamika Konputazionala (FDK)-ren bitartez esperimentuak eta simulazioak egiten ari dira. FDK programan dauden modeloekin ohiko errekuntzaren ezaugarriakzehaztasunez simulatu daitezke; bero transferentzia, jariakinen mekanika, erradiazio termikoa, erreakzio kimikoak eta turbulentzia-kimika interakzioa, baina ez flameless errekuntza, erreaktiboen diluzioa kontuan hartzen ez delako. Hori dela eta beste modelo berri batzuk garatu behar dira.