Opsomming: Die regsdomein vereis te alle tye goeie taalkennis en -gebruik. Dit gebeur dikwels dat ʼn regsdispuut om taal en taalgebruik sentreer. Een só ʼn voorbeeld is die saak Commissioner for South African Revenue Service v. Labat Africa Limited. In sowel die betrokke appèlhofsaak as die voorafgaande hofsake word die regsuitspraak gebaseer op die interpretasie van die woord 'onkoste'. Met hierdie artikel word daar vasgestel of die interpretasie korrek is deur die onderhawige woord semanties te ontleed deur Shuy (1986) se analisemodel aan te wend. Die semantiese ontleding fokus onder meer op die definisie van die woord, semantiese veldanalise, komponensiële analise en kontekstualisering.