Analízase neste traballo a significación do uso de mapas e percursos por territorios diversos en textos narrativos e ensaísticos de Ramón Otero Pedrayo (Os camiños da vida, Arredor de si, Fra Vernero, A romeiría de Gelmírez, Devalar, Pelerinaxes I e artigos publicados en prensa). En todos eles constátase como a utilización dos elementos cartográficos e mais do motivo das viaxes serve á idea da consolidación dun discurso literario-cultural inserido nun proxecto ideolóxico nacionalista. Ao mesmo tempo, este proxecto debe ser situado no contexto do labor continuado que a intelectualidade galega deste período desenvolve para competir pola influencia no espazo público.