DIE REALITEIT VAN DIE PRAKTYK: EISE EN UITDAGINGS WAT DIE BEGINNERSPRAKTYK AAN MAATSKAPLIKE WERKERS STELDie oorgang van universiteitstudent tot werknemer in die praktyk impliseer 'n transformasieproses, 'n metamorfose wat bepaalde eise en uitdagings aan jong volwassenes stel. Dit is veral jong professionele persone soos maatskaplike werkers wat met hierdie eise gekonfronteer word wanneer hulle die praktyk met idealistiese, dikwels onrealistiese, verwagtinge betree. Transformasie is 'n konsep wat op verskeie maniere geïnterpreteer en gedefinieer kan word, maar die omskrywing van transformasie as gedaanteverwisseling is die fokus in hierdie artikel wat handel oor die eise en uitdagings wat die beginnerspraktyk aan maatskaplike werkers stel. Dit handel oor die oorgang tussen student-wees en professionele werknemer en hoe hierdie prosesse binne die tersiêre instellings, welsynsorganisasies en binne die individu gefasiliteer word.
DOEL VAN DIE STUDIEDie oorhoofse doelstelling van hierdie studie was om vrese, verwagtinge, uitdagings en drome voor en na praktyktoetrede te ontleed, te bespreek en te vergelyk ten einde aanbevelings te maak wat tersiêre opleiding van maatskaplike werkers kan bevorder en praktyktoetrede kan vergemaklik.
NAVORSINGSMETODOLOGIEHierdie kwantitatief-kwalitatiewe verkennende studie (Grinnell, 2001;De Vaus, 2002; Cresswell, 2003;Neuman, 2003;De Vos, 2005) is in twee fases onder 16 vierdejaarmaatskaplikewerk-studente van die Noordwes-Universiteit (Potchefstroomkampus) onderneem. 'n Opname is deur middel van 'n vraelys gedoen om data voor praktyktoetrede rakende verwagtinge, drome en vrese vir die praktyk in te samel. Die uitdagings wat vanuit die literatuur geïdentifiseer is, is ingesluit in 'n tweede vraelys wat ses maande na praktyktoetrede deur dieselfde groep respondente voltooi is (Creswell, 2003:153-159; Babbie, 2007:245-246). Die meetinstrument wat benut is, bestaan uit beide kwantitatiewe en kwalitatiewe vrae en word onder die resultate as sodanig aangebied. Daar is gepoog om die hoogste mate van geldigheid en betroubaarheid in die meetinstrument in te bou (Ginsberg, 2001:187). Aangesien die populasie van die studie klein is, is die data per hand verwerk en dienooreenkomstig aangebied.
BEGRIPSOMSKRYWINGTen einde die konteks van hierdie artikel te verduidelik, moet duidelik verstaan word wat met transformasie en ander aanverwante begrippe bedoel word.
TransformasieVolgens Raubenheimer (1996) impliseer transformasie 'n proses van sielkundige heroriëntasie en internalisasie wat tot aanpassing by verandering lei. Transformasie moet dus nie gesien word