“…Երևան, ՀՀ մարզեր, երիտասարդների միգրացիա, աշխատանքային միգրացիա, սոցիալ-տնտեսական հետևանքներ, դրամական փոխանցումներ JEL: O15, R23 DOI: 10.52174/29538114_2023. Ներածություն: 20-րդ դարի երկրորդ կեսից սկսած՝ աշխարհի երկրների մեծ մասում գրանցվում է միգրացիոն գործընթացների ակտիվացում: Դրանցում տեղի ունեցող զգալի որակական փոփոխություններում, որոնք ուղեկցվում են հմուտ և բարձր որակավորում ունեցող մասնագետների, գիտաշխատողների, ինչպես նաև ուսանողների մեծածավալ արտագաղթով, ավելի ակնհայտ է դրսևորվում միգրացիոն հոսքերի երիտասարդացման միտումը: Այսպես՝ 2020 թվականին 15−34 տարեկան միգրանտների թիվը հասնում էր մոտ 90 միլիոն մարդու, որոնց 36%-ը ներկայացնում էր 15−24 տարիքային խումբը, իսկ 64%-ը՝ 25-34 տարիքային խումբը: Համեմատության համար նշենք, որ 1990 թվականին նույն տարիքային խմբի միգրանտների թիվը հասնում էր 52 միլիոն մարդու, որի 42%-ը 15−24 տարեկաններն էին, իսկ 58%-ը՝ 25−34 տարեկանները 2 ։ Չնայած միգրացիան տեղի է ունենում երիտասարդների գործազրկության բարձր մակարդակի և հայրենիքում արժանապատիվ աշխատանք գտնելու հնարավորությունների բացակայության համատեքստում, այնուհանդերձ, կարևոր է արձանագրել նաև այն փաստը, որ երիտասարդությունը տարիքային այն խումբն է, որն ավելի է հակված սոցիալ-տնտեսական, մշակութային և այլ ոլորտներում փոփոխություններին աջակցելուն, ունի նորարարությունների, նախաձեռնողականության մեծ ձգտում: Այդ տեսանկյունից՝ երիտասարդների արտագաղթի բոլոր հետևանքներն ավելի ակնառու են ՀՀ մարզերում: Մարզերի ժողովրդագրական, սոցիալ-տնտեսական զարգացման հեռանկարները, սոցիալական կայունության ամրապնդումը ուղղակիորեն պայմանավորված են երիտասարդ տարիքի բնակչության առկայութ-յամբ: Սահմանամերձ բնակավայրերում նրանց արտագաղթը, ի թիվս այլ սպառնալիքների, ծնում է ազգային անվտանգության լուրջ սպառնալիք ևս։ Երիտասարդության շրջանում միգրացիայի պատճառների և հետևանքների ուսումնասիրությունը, ինչպես նաև, համայնքների ժողովրդագրական, սոցիալ-տնտեսական իրավիճակի բարելավման համատեքստում, միգրացիայի կանխարգելման ուղղությամբ համապատասխան միջոցառումների, գործողությունների մշակումը չափազանց արդիական են: Ուստի, իրականացված հետազոտության նպատակը երիտասարդների միգրացիայի շարժառիթների և բազմաթիվ այլ ցուցանիշների համապարփակ ուսումնասիրությունն է, որը թույլ կտա բացահայտել այն խնդիրները, որոնք հաջորդում են երիտասարդների միգրացիային:…”