Pwysigrwydd y cyd‐destun: ymreolaeth a diwygio’r cwricwlwm mewn ysgolion gwledig

Abstract

Yn y swm mawr o ymchwil ar ddiwygio cwricwla, prin iawn yw’r sylw a roddwyd i oblygiadau lleoliad daearyddol, er y gall hyn fod yn ffactor pwysig. Mae’r broses bresennol ar gyfer diwygio’r cwricwlwm yng Nghymru yn cynnig cyfle i ysgolion newid eu hymarfer mewn ffordd sylfaenol. Er bod ysgolion gwledig wedi croesawu’r cyfle hwn, maent yn wynebu heriau sydd heb eu cydnabod gan y sefydliad addysgol ehangach. Mae’r erthygl hon yn cynnig golwg ar y broses diwygio o lefel yr ysgol, gan ddefnyddio data o gyfweliadau lled‐strwythuredig ag athrawon sy’n gweithio ar ddiwygio’r cwricwlwm. Mae’r dadansoddiad thematig yn dangos ymatebion brwdfrydig i’r diwygio ac i’r ymreolaeth gynyddol y mae’n ei haddo. Er hynny, mae heriau i’w hwynebu, yn cynnwys pryderon am staffio, mynediad at ddysgu proffesiynol a mynediad gan ddysgwyr at ddysgu allgwricwlar. Er bod ysgolion gwledig yn wynebu heriau unigryw sy’n ymwneud â’u lleoliad, mae’r ymchwil yn dangos bod eu hymateb i’r broses diwygio yn amlygu’r gallu i weithredu’n annibynnol yn unol â dyheadau’r cwricwlwm newydd.